İyünniñ 15-inde saba Aqyarda daa eki koronavirus adisesi qayd etildi, bildire Aqyarnıñ rusiyeli akimiyeti.
"Bu İspaniyadan qaytqan aqay. Şimdi o Qırımda tedaviylene. Ekinci adamnıñ alâqa dairesi ve yuqunçqa oğrağan yeri tayinlene. Yılnıñ başından berli Aqyarda koronavirusnen 187 adam hastalandı. 152 adam yahşı oldı, 3 adam vefat etti", - bildirile beyanatta.
Şeerniñ rusiyeli akimiyetiniñ malümatına köre, şimdi infektsiya hastahanesinde 108 adam nezaret altında buluna, 9-ıncı şeer hastahanesinde ise - 90 adam, yaşağan yerlerinde 842 adam baqıla.
Akimiyetniñ malümatına köre, Qırımda 546 koronavirus hastası qayd etildi, 36-ı çetelden keldi, 87-si qomşu Rusiyeden kelgenler ve olarnen alâqada olğanlardır. 16 COVID-19 hastası vefat etti. Aqyarda 185 insan hastalandı. 152 kişi tüzeldi, 3 insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.