İşğal etilgen Qırımnıñ Saq rayonında ve Aqyarda küçlü patlavlar ve atışlar oldı, Rusiye ava mudafaası çalıştı, Aqyarnıñ Rusiye akimiyeti Ukrayina silâlı quvetleriniñ ücümini toqtatqanını bildire.
"Krımskiy veter telegram-kanalı öz abunecilerine atıf eterek, saat 07:40-ta Saq rayonında eki küçlü patlav eşitilgenini, Novofedorovkadaki "Saq" uçaq alanından bir qırıcı uçaq avağa köterilgenini bildirdi. Saat 07:53-te "Saq" uçaq alanında Rusiye ava mudafaası ateş açtı.
Saat 07:44-te Aqyarnıñ "Qaçı" ava limanından eki raketa atıldı, Andreyevka üzerinde patladı. Saat 07:46-da Aqyarnıñ Fiolent burnu rayonında eki patlav oldı.
Aqyarnıñ Rusiye yolbaşçısı Mihail Razvojayev saat 07:47-de ava telükesini ilân etti, o ise saat 08:07-de lâğu etildi. Daa soñra o haber etti: "Aqyarda arbiyler saba Ukrayina arbiy quvetleriniñ ücümini keri qaytardı. Üç UAV Şimaliy tarafta deñiz üstünde urulıp tüşürildi. İç bir sivil obyekt zarar körmedi".
Rusiye Mudafaa nazirligi saba malümatında Rusiyeniñ 12 regionı, ilhaq etilgen Qırım ve Azaq deñizi üzerinde 208 ukrayin BPLA-nıñ zapt etilmesi ve yoq etilmesi aqqında esabat berdi.
Ukrayina arbiyleri bu malümatnı izaatlamadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.