Çeçekniñ 25-nden 26-na keçer gecesi işğal etilgen Aqyarda Qara deñiz flotunıñ arbiy-deñiz bazası ve RF Silâlı quvetleriniñ "Belbek" uçaq alanına ücüm etildi. Bunı UTH-niñ matbuat hızmeti bildire.
Qayd etilgenine köre, ücüm neticesinde uçucısızlar "Yamal" ve "Nikolay Filçenkov" BDK-larını ve "İvan Hurs" keşif gemisini urdı. Bundan da ğayrı, Rusiye Federatsiyasınıñ "Lukomka" arbiy taqımınıñ oquv merkezi, Rusiye ava mudafaası quvetleriniñ radiotehnik istihbarat ştabı ve MR-10M1 "Mıs-M1" radarlarına ücüm etildi.
UTH, Belbek uçaq alanında MiG-31 uçağına ve obyektniñ tehnikiy qullanuv qısmına darbe endirildi, dep bildire.
Mahsus hızmette zarar ve rusiyelilerniñ ğayıpları aqqında malümat berilmedi. Ukrayina telükesizlik hızmeti hatırlattı ki, Çeçek 18-nde olarnıñ mütehassısları Qırımğa ücüm etip, Qara deñiz flotunıñ üç arbiy gemisini urdı. Daa evel Qırım.Aqiqat, Çeçekniñ 18-nden 19-na keçer gecesi ücümler aqqında Ukrayina Mudafaa nazirliginiñ Baş idaresinde bildirilgenini yazğan edi.
Çeçekniñ 22-nde Ukrayina Silâlı quvetleriniñ Baş ştabında RF FSB-siniñ 22460 leyhasınıñ Rusiye sıñır hızmetiniñ Kezlev gemisine Aqyarda ücüm etilgeni aqqında esabat berildi.
Rusiye Mudafaa nazirligi bu malümatnı izaatlamadı. Qırım.Aqiqat muarririyeti yarımadada cenk areketleri şaraitinde bu malümatnı mustaqil olaraq teşkerip olamay.