Aqyarda plâjlarnı qapatmaqnı planlaştırmaylar, lâkin şeerniñ Rusiye akimiyeti Şimaliy tarafında sığınaqsız raatlıq yerlerine barmaqnı tevsiye etmey. Bu aqta Rusiye kütleviy haber vastalarına Rusiye Federatsiyası nezaretindeki Aqyar yolbaşçısı Mihail Razvojayev Rusiye Qanun çıqarıcı toplaşuvınıñ fevqulâde toplaşuvı neticesinde bildirdi.
"Yalılarnı qapatmaq, deputatlarnen beraber bugün qarar aldıq, olmaycaq. Bu tedbirni amelge keçirmek qıyın olacağını yahşı añlaymız, Şimaliy tarafnıñ plâjları sığınaqlarnen donatılmağan, esas inşaatları olmağan, şimdiki vaqıtta yüksek telükege saip ola. Şunıñ içün anda bulunğan vaqıtnı azlaştırmaq kerek, amma anda qoruv qurulışları qoyulğanına qadar ziyaret etmekten vazgeçmek daa yahşıdır", — dep ayttı Razvojayev.
Bundan da ğayrı, Rusiye kontrolindeki Aqyar yolbaşçısı Mihail Razvjayev, Balıqlava körfeziniñ qoruvı quvetleştirilecek, gece ise onıñ serbest kirişi qapatılacaq, dep bildirdi. Onıñ aytqanına köre, suv yüzeyinde qoşma közetüv noqtaları qoyulacaq. Razvjayevniñ aytqanına köre, kerekli donatmalar endi bar.
Daa evel Rusiye Devlet dumasınıñ deputatı Dmitriy Gusev Aqyarnıñ rusiyeli başı Mihail Razvojayevge şeer plâjlarınıñ bir qısmını qapatmaqnı teklif etti.
İyünniñ 23-nde yerli ve rusiyeli telegram kanalları Aqyar, Kezlev ve Saq rayonlarında patlavlarğa oşağan yüksek sesler ve ava mudafaasınıñ işi aqqında bildirdiler. ASTRA telegram kanalınıñ Aqyar sakinlerine atıf etip yazğanına köre, ücüm vaqtında şeerde ava telükesi aqqında signal yoq edi, plâjlarda ise balaları ile çoq qoranta bar edi. Daa soñra Razvojayev Uçkuyevkada ve Lübimovkada elâk olğan ve yaralanğanlar aqqında bildirdi.
Rusiye arbiyleri, iyün 23 künü Aqyarda ukrayin quvetleri Amerika istehsalı ATACMS raketasını attı, dep bildire. Rusiye Mudafaa nazirliginiñ qayd etkenine köre, "ava mudafaasınıñ tesiri" neticesinde raketa kursundan çıqtı ve onıñ parçaları, hususan, plâjda tüşti.
Rusiye akimiyeti, tüşken parçalar neticesinde dört insan elâk oldı, şu cümleden eki bala, 151 kişi yaralandı, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.