Rusiye kontrolindeki Aqyar yolbaşçısı Mihail Razvojayev şeerde «ava mudafaa sistemalarınıñ işi» aqqında bildirdi.
«Bugün kündüz Aqyarda kene ava mudafaa sistemaları çalıştı. İlk malümatqa köre, Duvanköy (Verhnesadovoye) rayonında uçucısız cihaz tüşürildi. Şimdi ufuq temiz. Vaziyet kontrol altında», – dep yazdı Razvojayev Telegram kanalında.
Rusiye Mudafaa nazirligi bu malümatnı daa izaatlamadı. Ukrayına resmiy şahıslarınıñ da izaatları yoq.
Soñki aftaları Aqyarda aman-aman er kün patlav sesleri eşitile. Şeerniñ Rusiye akimiyeti bunı tüşürilgen «Ukrayına uçucısızları» ve «ava mudafaa sistemasınıñ işi» dep añlata.
Daa evel berilgen malümatqa köre, Aqyarda sığınaqlar teşkerile.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.