İşğal etilgen Aqyarda eñ az bir patlav oldı. Qırım.Aqiqat mühbiriniñ malümatına köre, patlav saat 19:11-de oldı.
«Aqyarnıñ merkezinde raketa ve patlavğa oşağan küçlü sesler eşitildi», – dep qayd etti o.
Şeerniñ Rusiye yolbaşçısı Mihail Razvojayev Rusiye arbiyleri talim keçire, dep bildirdi.
«Şimaliy, cenübiy tarafta ve Kazak körfezinde flot atışlı talimler keçire. Şeerde tınçlıq», – dep yazdı o, Telegram kanalında.
Razvojayev mayısnıñ 25-ne keçer gecesi Aqyar uçucısızlarnıñ ücümine oğradı, dep bildirgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.