Sentâbrniñ 23-nde saat 08:22 Aqyarda küçlü patlav sesi eşitildi, dep bildirdi Qırım.Aqiqat mühbiri.
Onıñ sözlerine köre, patlav dalğasından pencere camları titregen. Bundan soñ şeerde ava telükesi signalı ilân etilgen.
Biraz soñra Aqyarnıñ işğal yolbaşçısı Mihail Razvojayev Aqyarğa raketa ücümini tasdıqladı, onıñ sözlerine köre Ava mudafaası sisteması çalışqan.
Onıñ bildirgeni kibi, raketa parçaları Suharna deresiniñ iskelesi yanında tüşken.
Bundan soñ deñiz yolcu naqliyatınıñ areketi toqtatıldı.
Muarririyet Rusiye reberliginiñ bildirmelerini tasdıqlap olamay.
Sentâbrniñ 22-nde kündüz işğal altındaki Aqyarda bir qaç patlav aqqında haber etildi. Şeerniñ Rusiye valisi Mihail Razvojayev Telegramda Rusiye Qara deñiz flotunıñ ştabına raketa darbesi endirildi, dep haber etti.
Rusiye Mudafaa nazirligi darbeden soñ bir arbiy ğayıp oldı, ava mudafaa quvetleri beş raketa urıp tüşürgen, dep bildirdi. Aynı vaqıtta içtimaiy ağlarda darbe neticesinde altı kişi yaralandı, dep yazalar. Bu malümatnı tasdıqlaycaq resmiy bir delil yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.