Aqyarda iyün 23-nde aqşam saat 22:03 şeerniñ Rusiye kontrolindeki başı Mihail Razvjayev haber etkenine köre, ava telükesi 10 daqqa ilân etilgen edi. Bundan da ğayrı, Kezlev, em de Molçnoye ve Vitino köyleriniñ sakinleri bir sıra patlavlar aqqında bildireler, bunı Qırım telegram-kanalları ve yerli subetlerde körgenler yaza.
Vitino rayonında kâinatnı nezaret etüv stantsiyası bar. 2023 senesi dekabr ayında oña ücüm etilgen edi. Daa evel Molçnoye ve Vitino rayonlarında Rusiye ava mudafaası quvetlerine ücüm etildi. Rusiye ordusınıñ bu obyektlerine yapılğan ücümler aqqında tafsilâtlarnı Qırım.Aqiqat jurnalistleri tarafından yaratılğan Qırımnıñ arbiy obyektleri haritasında baqmaq mümkün.
Bu ücümniñ aqibetleri aqqında resmiy malümat daa yoq. Qırım.Aqiqat kütleviy haber vastalarınıñ malümatını teşkere .
İyünniñ 23-nde saba yerli ve rusiyeli telegram kanalları Aqyar, Kezlev ve Saq rayonlarında patlavlarğa oşağan yüksek sesler ve ava mudafaasınıñ işi aqqında bildirdiler. ASTRA telegram kanalınıñ Aqyar sakinlerine atfı etip yazğanına köre, ücüm vaqtında şeerde ava telükesi aqqında signal yoq edi, plâjlarda ise balaları ile çoq qoranta bar edi. Daa soñra Razvojayev Uçkuyevkada ve Lübimovkada elâk olğan ve yaralanğanlar aqqında bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.