Sentâbrniñ 22-nde aqşam işğal etilgen Aqyarda uçucısızlarnıñ ücümi qayd etildi. Bu aqta Qırım Telegram kanalları yazdı.
Şeerniñ Rusiye yolbaşçısı Mihail Razvojayev ava mudafaasınıñ quvetleri Aqyarğa yaqınlaşqan altı dronnı yoq etti, dep bildirdi. Bir uçucısız Kaça rayonında tüşürilgen, anda, onıñ aytqanına köre, ot yanıp başlağan.
Qırımnıñ arbiy obyektler haritasına köre, Kaça qasabasında Rusiye Qara deñiz flotuna ait Rusiye arbiy uçaq alanı bar. Anda 318-inci ayrı qarışıq aviatsiya polku yerleşe. Bölükniñ An-26, Be-12 uçaqları ve Ka-27 vertolötları bar.
Rusiyeniñ Ukrayinağa qarşı büyük istilâsı başlağan soñ Rusiye regionları ve Rusiye işğal etkne topraqlar muntazam sürette ateş ve uçucısızlarnıñ ücümlerine oğray.
Ukrayina tarafı istilâcınıñ ücüm küçüni eksiltmek içün Rusiye ordu bazalarını zayıflatuv işini keçire, dep qayd ete.