Aqyarda aprelniñ 24-nde daa bir COVID-19 hastası qayd etildi. Bu aqta şeerniñ Rusiye ükümetiniñ yolbaşçı vazifelerini vaqtınca eda etken Mihail Razvojayev «STV Sevastopol» telekanalınıñ yayınında ayttı.
«Bugün daa bir hastamız qayd etildi. Yarınki malümatqa ilâve etilecek. 26-ncı oldı. Bu insan çoqtan yuqunç hastahanesinde buluna. Onı evden izolâtsiyadan alğanlar. Bugün diagnozı tasdıqlandı. Pnevmoniyası bar edi. Alı orta ağır», – dedi Razvojayev.
Aprelniñ 24-nde saba Qırımda dört yañı koronavirus hastası qayd etildi. Al-azırda Qırımda 57 koronavirus hastası bar. Aqyarda 26 COVID-19 hastası qayd etildi.
Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.