Aqyarda dekabrniñ 25-nde saba 85 yañı COVID-19 hastası qayd etildi. Hastalar – eki yaştan 91 yaşqa qadar insanlar. 64 yaştan 72 yaşqa qadar dört kişi vefat etti, dep bildire şeerniñ Rusiye ükümeti.
«Umumen yılnıñ başından Aqyarda 6260 kişi yañı koronavirus yuqunçına oğradı. 5848 insan tüzeldi, 215 kişi vefat etti», – dep aytıla haberde.
Akimiyetniñ malümatına köre, bugünki künde 170 insan şeer hastahanelerinde buluna, yengil hastalar içün bölükte 182 kişi yata, 619 insan közetile.
Keçken künü Qırımda 338 insan koronavirus yuqunçına oğradı. Umumen 23156 COVID-19 hastası qayd etildi. Tüzelgen 17817 kişi yiberildi, 459 insan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.