İşğal etilgen Aqyarda yarımadanıñ büyük şirketlerinden biriniñ yaqarlıq stantsiyalarında yaqarlıq satıluvı sıñırlandı – bir kişige eñ çoq 30 litr. Bu aqta şeerniñ Rusiye yolbaşçısı Mihail Razvojayev bildirdi.
«Bugünden başlap yaqarlıq stantsiyalarında Ai-100, Ai-95NP, Ai-95, Ai-92… bir maşinağa ya da kanistrağa 30 litr satılacaq. Yani maşinanen kelgen olsañız, saylamaq kerek olacaq: maşina ya da kanistrağa. Kanistranen kelseñiz, yaqarlıq toldura bilesiñiz», – dep yazdı memur Telegram kanalında.
Razvojayevniñ aytqanına köre, böyle rejim bütün yaqarlıq stantsiyalarında benzin toplap, adiy iş cedveline qaytmağa imkân berer.
Onıñ bildirgenine köre, şeerge benzin toqtamayıp ketirile, amma yaqarlıq stantsiyaları adiy iş planına qaytıp olamay.
Regionnıñ yaqarlıq stantsiyalarında tek 95ULTRA ve A100 benzinleri peyda oldı, amma eñ çoq A95 ve A92 talap etile.
Berilgen malümatqa köre, Qırım soñki yıllarda eñ büyük yaqarlıq buhranını yaşay. Rusiye akimiyeti bunıñ Rusiyede cermay işlenmesiniñ eksilmesinen bağlı olğanını tanıy. Bunıñ sebebi Ukrayina uçucısızlarınıñ Rusiye cermay zavodlarına qarşı muntazam ücümleri oldı.