Aqyarda yerli vaqıt ile saat 10:19-dan başlap ava telükesi ilân etildi, Rusiye monitoring telegram kanalları şeerde ve Qırım yarımadasınıñ şimalinde raketa telükesi aqqında yaza.
Rusiye kontrolindeki Aqyar yolbaşçısı Mihail Razvojayevniñ bildirgenine köre, Rusiye aviatsiyası Qara deñizde ava nişanlarını yoq ete. Rusiye Mudafaa nazirligi vaziyetni izaatlamadı. Mustaqil menbalarnıñ aytqanlarını şimdilik teşkermek mümkün degil.
Bundan da ğayrı, Rusiye monitoring telegram kanalları Razdolnıy ve Canköy rayonlarında raketa telükesi bar olğanını bildire. Bundan ğayrı, Qırımnıñ Rusiye akimiyetiniñ bildirgenine köre, Keriç köpründe avtomobil naqliyatınıñ areketi toqtatıldı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.