Aqyarda saat 15:20-den 10 daqqa devamında eki kere ava telükesi ilân etildi, yerli telegram kanalları ise, bundan evel şeerde patlav sesi eşitildi, dep yaza.
Böyleliknen, "Krımskiy veter" telegram kanalı, Fiolent burnu rayonında patlav aqqında haber etip, dumanlı fotoresimlerni derc etti. Rusiye nezaret kanalları, patlav Ukrayina Silâlı quvetleri tarafından darbe endirgen Flotskiy rayonında silâ qullanuvı ile bağlı olğanını yaza. Aqyarnıñ rusiyeli yolbaşçısı, öz nevbetinde, Rusiye flotunıñ talim keçirgenini bildirdi — bir talim atışı yapıldı.
Daa evel haber etilgenine köre, Aqyarda Fiolent burnu ve Balıqlava yaqarlıq stantsiyası civarında patlavlar eşitildi. Daa soñra şeerniñ rusiyeli başı Mihail Razvojayev, Aqyarğa avadan etilgenini bildirdi.
Onıñ aytqanına köre, olar Balıqlava rayonında ve suv astında yoq etildi. Razvojayevniñ aytqanına köre, ücüm neticesinde orman alanında yanğın çıqtı, şahsiy evlerniñ qoraları ve eki bağça şirketiniñ otları yandı, evlerniñ birinde pencerelerniñ camları yıqıldı, üç avtomobil zararlandı.
Aynı zamanda "Krımskiy veter" telegram kanalı, patlav ve yanğın Balıqlavda Flotskoye (Karan) köyü yanındaki arbiy bölükte oldı, dep yazdı.
Daa soñra Ukrayina Ava quvetleri iyülniñ 1-nde ilhaq etilgen Qırımda silâ anbarına ücüm etilgenini bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.