İşğal etilgen Aqyarda tapılğan uçucısızlar sebebinden "Tavrida" yolunıñ bir qısmı ve bir qaç yol vaqtınca qapatıldı. Areket sıñırlanuvı aqqında şeer memuriyetiniñ Rusiye yolbaşçısı Mihail Razvojayev bildirdi.
Onıñ haber etkenine köre, "Tavrida" yolunıñ 271-inci 275-inci kilometrine qadar parçası eki tarafqa da qapalı edi. Vodokanal qasabasından Duvanköy (Verhnesadovoye) civarındaki çatalğa qadar keçmege mümkün degil. Qart Biy (Şturmovoye) – Hmelnitskoye yolunda areket sıñırlandı.
Razvojayevniñ bildirgenine köre, bu yollarda bir qaç uçucısız tapıldı. Mahsus hızmetler olarnen çalışa. İnkermanğa ketkenlerge memur Laboratornoye şossesini qullanmağa tevsiye etti. Aqmescit tarafından Aqyarğa İnkermandan keçeler, dep bildirdi Razvojayev.
GUP "Sevelektroavtotrans im. A. S. Krupoderova" bildirgenine köre, dört avtobusnıñ areketi deñişti. №91 avtobusı Balıqlava şossesiniñ 5-inci kilometri ve Qart Biy (Şturmovoye) köyü arasında qatnay. №92, 103 ve 126 İnkermandan Laboratornoye şossesinden kete. №126 avtobusı vaqtınca Hmelnitskoye, Qart Biy (Şturmovoye) ve Saharnaya Golovkağa kirmey.
Qapatılğan yollarnıñ areketi mahsus hızmetlerniñ işi bitken soñ ğayrıdan tiklenecek. Akimiyet aktual malümatnı "Transport Sevastopolâ" resmiy kanalında derc etmege vadeye ete.
Ukrayina arbiyleri ücümni şimdilik izaatlamadı.
Qırım.Aqiqat cenk vaziyetinde bu malümatnı mustaqil şekilde teşkerip olamay.
Hatırlatamız, avgustnıñ 18-nde Aqyarda Zafer Parkı civarında plâj qoralandı. Razvojayev bildirgenine köre, anda uçucısız keldi, onı radioelektron küreş quvetleri bastırğandır. Onı o yerde patlatmağa istediler.