İlk küzniñ 6-nda aqşam ve 7-ne keçer gecesi Rusiye Federatsiyası tarafından işğal etilgen Aqyar ve Ermeni Bazarda patlavlar eşitildi. Aqyarda Rusiye akimiyeti ava telükesini ilân etti.
Aqyarnıñ rusiyeli yolbaşçısı Mihail Razvojayevniñ bildirgenine köre, Rusiye arbiyleri 3 uçucısız uçaqnı toqtatıp, ücümni zararsızlaştırdı. Onıñ aytqanına köre, Nikolay Muzıka ve Suprun soqaqları civarında BPLA-nıñ urulmasından soñ eki patlav qayd etildi, bir qaç çoq qatlı ev ve bala bağçasınıñ camları uruldı.
Başta şeerniñ rusiyeli yolbaşçısı üç kişi zarar körgenini bildirdi, amma soñra, çağına yetmegen bir qız elâk oldı, dep bildirdi.
Onıñ aytqanına köre, daa üç insan yaralandı: "erkek ağır alda, komada", daa bir 18 yaşında qız ve 16 yaşında oğlan bala hastahanesine ketirildi, anda olarğa yardım etildi ve evge yiberildi.
Faal arbiy areketler şaraitlerinde muarririyetniñ bu malümatnı mustaqil menbalar yardımınen teşkermek imkânı yoq.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.