İşğal etilgen Qırımda Aqyar sakini "Rusiye ava mudafaasına dair malümatnı toplap, çetel istihbaratına bergeni" içün 18 yıl sert rejimge üküm etildi. Bu aqta Qırım ve Aqyardaki Rusiye FSB idaresiniñ matbuat hızmeti haber etti.
Rusiye uquq qoruyıcıları bildirgenine köre, 1974 senesi doğma mabüs Ukrayina telükesizlik hızmetiniñ casusı tarafından celp etildi. Reberiniñ vazifesine köre, mabüs şeerdeki Rusiye Federatsiyası Silâlı quvetleri Ava mudafaasınıñ obyektleri aqqında malümat toplap bergen. İleride bu malümat raketa darbelerini endirmek içün çetel istihbaratına berilgen eken.
"Erkek elnen yapılğan patlayıcı cihaznıñ parçalarını yaşağan yerinde saqlağan edi: bir kilogrammdan ziyade geksogen temelli çetel patlayıcı cihaznıñ eki briketi ve radioidareli icra cihazı", – dep aytıla haberde.
Mabüs 18 yıl sert rejimli tüzetüv koloniyasında qalmasına üküm etildi, 1 yılı sıñırlandı ve 330 biñ ruble para cezası berildi. Üküm şimdilik işke tüşürilmedi.
Erkekniñ adı ve soyadı aytılmay, açıq izaatları ise yoq. Ukrayina telükesizlik hızmeti bu haberlerni izaatlamadı.
Bundan evel Rusiye mahkemesi 51 Aqyarlını Ukrayina telükesizlik hızmeti ile işbirliginde qabaatlap, 15 yılğa azatlıqtan marum etti. Berilgen malümatqa köre, erkek Ukrayina telükesizlik hızmetiniñ hadiminen messencerde bağlanıp, Rusiye ordusı aqqında istihbarat malümatını toplamaq ve naqliyat infrastrukturasınıñ obyektleri aqqında malümat toplamaq kerek edi. FSB bildirgenine köre, Aqyarnıñ evinde demiryol köpürlerinden birini patlatmaq içün kerek olğan patlayıcı cihaz tapıldı. Onı regionda Rusiye ava mudafaasına dair malümat topramaq içün tanışını celp etkeninde qabaatlandı.