Aqyar ve işğal etilgen Qırımnıñ bir qaç rayonı gece belli olmağan uçucısızlarnıñ ücümine oğradı, dep bildirdi Qırım yarımadasında Rusiye işğalci akimiyetiniñ vekilleri.
«Keçken gece Qırım Cumhuriyetiniñ farqlı rayonlarında 6 uçucısız cihaz REB vastalarınen endirildi ve ava mudafaa sistemasınıñ quvetleriniñ tüşürildi. Ölgen ve yaralanğanlar yoq», – dep ayta Rusiye kontrolindeki Qırım yolbaşçısı Sergey Aksenov Telegram kanalında.
Gece Aqyar uçucısızlarnıñ ücümine oğradı, dep bildire Aqyarnıñ Rusiye yolbaşçısı Mihail Razvojayev.
«Qaçı rayonında Qara deñiz flotu quvetleriniñ atıcı silâsınen 2 uçucısız tüşürildi, daa bir qaç uçucısız REB vastalarınen endirildi», – dep ayta Razvojayev Telegram kanalında.
Onıñ bildirgenine köre, şeerdeki obyektler zarar körmedi. Telegram kanallarınıñ malümatına köre, bir uçucısız Bağçasaray rayonında da tüşürildi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.