Gece ve saba işğal etilgen Qırım ve Aqyar dron ücümine oğradı, ava telükesi ilân etildi, Rusiye ava mudafaası çalıştı, Qırım yarımadasınıñ bazı regionları ve "Kaça" uçaq alanında küçlü patlavlar aqqında haber etile.
"Krımskiy veter" Telegram kanalı abunecileriniñ malümatına esaslanıp haber etkenine köre, saat 21.14-te Saq rayonında patlav oldı, yarı geceden evel Canköyde darbe oldı. Dronlar Aqyarğa da ücüm etti, saat 00.36-da "Kaça" uçaq alanında küçlü patlav oldı, bu uçaq alanında ekinci ve üçünci patlavlar gece saat üçlerde oldı.
Aqyarnıñ Rusiye yolbaşçısı Mihail Razvojayevniñ bildirgenine köre, "Aqyarda arbiyler Ukrayina Silâlı quvetleriniñ ücümini keri qaytara, ava mudafaası ve mobil ateş gruppaları çalışa".
Ava telükesi şeerde üç kere oldı – saat 22:33, 00:08, 06:52-de. Saat 07:20-de ava telükesi bitti.
Rusiye Federatsiyasınıñ Mudafaa nazirligi saba keçken gece Rusiye ava mudafaası 7 region, işğal etilgne Qırım ve Azaq ve Qara deñizlerinde 140 uçucısıznı tutıp yoq etti, dep bildirdi.
Ukrayina ve Rusiye arbiyleri bu malümatnı izaatlamadılar.
Qırım.Aqiqat muarririyeti cenk vaziyetinde bu malümatnı mustaqil şekilde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.