Qırımda aprelniñ 17-ne keçer gecesi kene patlavlar ve Rusiye Federatsiyası Ava mudafaasınıñ işi eşitildi, dep yaza yerli saifeler içtimaiy ağlarda. Aqyarda ava telükesi ilân etildi, Keriç köprü qapatıldı.
"Krımskiy veter" Telegram kanalı abunecileriniñ malümatına esaslanıp yazğanına köre, aprelniñ 16-nda aqşamdan berli Kefede, Aqyarda "Belbek", "Kaça" arbiy uçaq alanları ve Hersones burnunda bir qaç patlav oldı. Bundan ğayrı, Novofedorovka yaqınlarında "Saq" uçaq alanı civarında ava mudafaasınıñ işi eşitildi.
Aynı vaqıtta, Aqyar Rusiye yolbaşçısı Mihail Razvojayev saat 23:37-den başlap gece 0:13-ke qadar devam etken şeerde ava telükesi ilân etildi. Onıñ aytqanına köre, Rusiye arbiyleri Şimaliy tarafta ve Hersones burnunda 3 nişannı urıp tüşürdi. Razvojayev aytqanlarınıñ delillerini köstermedi.
Rusiye akimiyetii saat 22:30-dan 23:30-ğa qadar Keriç köpründe areketni qapattı, dep bildirdi. Qapatuv sebepleri aytılmadı, amma köpür areketi ava telükesi vaqtında toqtatılmay.
Aprelniñ 17-nde saba Rusiye Mudafaa nazirligi Rusiyeniñ 8 regionında ve işğal etilgen Qırımda tüşürilgen 62 dron aqqında bildirdi. Qırım yarımadasına ücüm etken dronlarnıñ sayısı daa aytılmadı. Uçurılğan dronlarnıñ sayısını müessise haber etmedi. Cenk vaziyetinde seslendirilgen malümatnı alternativ menbalar vastasınen tasdıqlamaq imkânsız ola.
Ukrayina arbiyleri bu vaziyetni şimdilik izaatlamadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.