Bugün gece işğal etilgen Qırım ve Aqyarda patlavlar eşitildi, dronlar uçtı, mobil ateş gruppaları çalıştı. Bu aqta yerli monitoring kanalları ve Rusiye akimiyeti bildirdiler.
Patlavlar ve mobil ateş gruppalarınıñ atışı Aqmeçit qasabası, Aqyar (şu cümleden Balıqlava TES yaqınlarında), Kezlevde oldı, dep haber ete "Krımskiy veter" Ukrayina Telegram kanalı. Keriçte ve Büyük Onlar qasabasında mobil ateş gruppalarınıñ atışları eşitildi.
Aqyar ve Keriçniñ Rusiye akimiyeti ava telükesini bir qaç kere ilân etti.
Rusiye Mudafaa nazirligi saba bildirgenine köre, gece 18 Rusiye regionı, işğal etilgen Qırım ve Azaq ve Qara deñizlerinde 605 ukrayin uçucısızı yoq etildi.
Ukrayina arbiyleri Qırımda gece olğanlarnı şimdilik izaatlamadı.
İyün başından arbiy ve energetika obyektleri, Qırımdaki Rusiye logistik yolları büyük cenk vaqtında Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".