Rusiye Federatsiyası qanunsız şekilde ilhaq etken Aqyarda Ukrayinanıñ Qırımnıñ yaqarlıq ve energetika sistemasın qarşı ücümlerinden soñ iyünniñ 22-nden başlap sıñırlavlar kirsetile. Bu aqta şeerniñ Rusiye yolbaşçısı Mihail Razvojayev bildirdi.
Onıñ aytqanına köre, yaqarlıq iyünniñ 22-nde ve 23-nde iqtisat etmek maqsadınen satılmaycaq. Tek şeer yaşayışını temin etken mahsus hızmetlerniñ naqliyatı yaqarlıqnen toldurılacaq. Bundan evel Max messencerinde QR-kodlarnen yaqarlıq berile edi, amma iyünniñ 21-nde bunı lâğu ettiler.
Şeerde cemaat naqliyatı iş saatlarını deñiştire. Artıq tek saba beş buçuqtan aqşam doquzğa qadar çalışacaq. Paromlar qatnamaycaq. Tek yolcu katerleri çalışacaq.
Qayd etilgenine köre, ava telükesi vaqtında cemaat naqliyatı çalışacaq: iyünniñ 22-nde kündüz saat üçten başlap.
Büyük ticaret obyektleri (alış-veriş merkezleri, tükân ve gipermarketler) saba 7-den aqşam 8-ge qadar çalışacaq. Kiçik tükân ve aphaneler istegenleri kibi çalışa bile. Qave ve aş yerleri saba 8-den aqşam 8-ge qadar çalışacaq.
Razvojayev soqaqlar aydınlatılmaycaq, dep qayd etti. Aqyar tışında elektrik hatlarına büyük yük kelgeni içün elektrik energiyası vaqtınca kesile bile.
Bütün soqaq tedbirleri iyünniñ 22-nden başlap ve ayrı bir fermanğa qadar lâğu etile.