Ukrayina Mahsus operatsiyalar küçleri Aqyarda Balıqlava TESine darbe endirdi, dep haber ete müessiseniñ matbuat hızmeti içtimaiy ağlardaki saifelerinde.
"Ücüm iyulniñ 14-ne keçer gecesi oldı. İlk malümatqa köre, ücüm neticesinde Siemens SGT5-2000E turbinalarından biriniñ maşina tsehi ve suvutuv sisteması zarar kördiler. Nasos donatması zarar körse, tamir işi 2 aydan 5 ayğa qadar ala bile", – dep aytıla haberde.
Cenk vaziyetinde seslendirilgen malümatnıñ doğrulığını tasdıqlamaq zor.
Bundan evel iyulniñ 14-ne keçer gecesi Balıqlava TESine darbe endirilgendir, dep haber etildi.
İyün ve iyül aylarında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
İyulniñ başından Ukrayina Uçucısız sistemalar quvetleri er kün Azaq ve Qara deñizlerinde Qırımğa yaqarlıq da taşığan Rusiye "kölge flotunıñ" tankerleri ve diger gemilerine darbe endirgenine dair esabat bere.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.