Aqyarda saat 11:30-dan başlap ava telükesi ilân etildi, şeerniñ Rusiye yolbaşçısı Mihail Razvojayev Rusiye Federatsiyası ava mudafaasınıñ işi aqqında bildirdi.
"Aqyarda arbiyler, ava mudafaası ve mobil ateş gruppaları Ukrayina Silâlı quvetleriniñ ücümini keri qaytara. İlk malümatqa köre, Şimaliy taraf civarında 3 ava nişanı urıp tüşürildi. İlk malümatqa köre, kimse yaralanmadı", – dep yazdı Razvojayev içtimaiy ağlardaki saifelerinde.
Razvojayev aytqanlarınıñ delilini köstermedi, onıñ malümatını başqa menbalarda teşkermek cenk vaziyetinde imkânsız ola. Saat 12:25-te ava telükesi bitti.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.