Aqyarnıñ Rusiye Fevqulâde vaziyetler nazirliginiñ idaresi ava telükesi bitti, dep bildirdi, dep aytıla müessiseniñ yerli saatnen 11:48-de aydınlatqan haberinde.
Bundan ğayrı, Rusiyeniñ «Aqyar şeeriniñ yol-naqliyat inkişafı müdirligi» deñiz yolcu naqliyatınıñ areketi tekrar başladı, dep haber etti.
Rusiye akimiyeti ava telükesi bitkenini şimdilik bildirmey, şeerge tekrar dronlar ücüm etkenini de ilân etmegen edi.
Aqyar sakinleri noyabrniñ 27-nde saba şeerge tekrar ücüm yapılğanda ava telükesi signalı olmadı, dep şikâyet ete. Şikâyetler şeerniñ Rusiye yolbaşçısı Mihail Razvojayevniñ saifesinde tefsirlerde yazıla.
Hatırlatamız, Aqyarda yerli saatnen 9:15-te ava telükesi ilân etildi, amma saat 9:42-de Razvojayev şeerde ava mudafaası işini devam ettirgenine baqmadan, onıñ toqtalğanını bildirdi, ve Rusiye Federatsiyası kontrolindeki Aqyar yolbaşçısı uçucısızlar tüşürilgenini bildirdi.
Bundan evel Razvojayev öz Telegram kanalında şeerge qarşı birleşken ücüm devam etkenini bildirdi. Qırım.Aqiqat mühbiri haber etti ki, şeerde Rusiye ava mudafaası «çoqtan berli böyle çalışmadı» dep, küçlü bir patlav aqqında haber etti.
Razvojayevniñ aytqanına köre, Kaçi rayonında 2 uçucısız urıp tüşürilgen. Onıñ haber etkenine köre, Aqyarnıñ Rusiye qurtaruv hızmetiniñ malümatına köre, Kaça şossesi yanındaki Mamaşay (Orlovka) rayonında parçalar tüşti. Razvojayevniñ sözlerini teşkermek şimdilik mümkün degil.
Qırım.Aqiqat mühbiri qayd etkenine köre, tek bir ses dronlarnıñ urulmasına beñzedi. Qalğan küçlü sesler raketalar atılğanına ve patlavlarğa oşadı. Onıñ aytqanına köre, yerli saatnen 10:25-lerde daa bir küçlü patlav eşitildi. Şeerde ekinci kere telüke signalı tekrar olmadı.
«Krımskiy veter» Telegram kanalı yazğanına köre, Aqyarnıñ Streletskaya körfezindeki Nahimov Arbiy-deñiz oquv yurtunda tuman körüne. Qırım.Aqiqat bu malümatnı teşkere.
Yerli saatnen 9:42-de şeerniñ Rusiye yolbaşçısı Mihail Razvojayev ava telükesi bitkenini bildirdi. Berilgen malümatqa köre, Aqyarda ava telükesi ilân etilgen soñ patlav sesleri kene eşitildi. Aynı vaqıtta Rusiye Federatsiyası kontrolindeki şeer akimiyeti ava telükesini tekrar ilân etmedi.
Aynı vaqıtta, Rusiye ve Qırım Telegram kanalları Novofedorovkadaki «Saki» uçaq alanında ava mudafaa işiniñ sesleri aqqında haber etmege devam ettiler.
Aqyarda yerli saatnen 9:15-te ava telükesi ilân etildi. Bundan evel Rusiyeniñ «Aqyar şeeriniñ yol-naqliyat inkişafı müdirligi» deñiz yolcu naqliyatınıñ areketi toqtatıldı, dep bildirdi.
Rusiye monitoring pablikleri Qırım yarımadasınıñ ğarbiy yalısına dronlarnıñ ücümleri ve «Neptun» raketalarnıñ telükesi aqqında haber etti. Hususan, şeerge eki «Neptun» raketası ve bir «S-200» raketası, em de 20-ge qadar uçucısız atılğanı aqqında haberler kele.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.