Aqyarda aprelniñ 28-nde kündüz kene ava telükesi ilân etildi, dep haber etti Rusiye kontrolindeki şeer yolbaşçısı Mihail Razvojayev.
Telüke saat 11:02-den 11:15-ke qadar devam etti. Razvojayevniñ aytqanına köre, bu vaqıt içinde Rusiye arbiyleri Balıqlava ve Şimaliy taraf etrafında eki dronnı tüşürdi. Bu malümatnı cenk vaziyetinde tasdıqlamaq zor. Umumen uçurılğan uçucısızlarnıñ sayısını Rusiye arbiyleri ve akimiyeti aytmay.
Ukrayina arbiyleri haber derc etilgende vaziyetni izaatlamadı.
Tünevin aqşam ve gece Aqyarda ava telükesi ilân etildi, şeerde patlavlar, ava mudafaasınıñ işi ve atışlar eşitildi.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.