Aqyarda iyülniñ 2-nde 119 yañı COVID-19 hastası qayd etildi, tüzelgen 75 kişi hastahaneden yiberildi, 59 yaşından 89 yaşına qadar dört insan vefat etti, dep bildire şeerniñ Rusiye ükümeti.
«Umumen (pandemiya vaqtında – QA) Aqyarda 16 852 kişi yañı koronavirus yuqunçına oğradı. 14 814 insan tüzeldi, 744 kişi vefat etti. 403 insan közetile, bu insanlar hastalarnen alâqada oldı, amma COVID-19 diagnozı tasdıqlanmadı», – dep aytıla haberde.
Bir kün evelsi Aqyarda 114 yañı koronavirus hastası qayd etildi.
Qırımda keçken künü, yerli akimiyetniñ malümatına köre, 308 yañı koronavirus hastası qayd etildi.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya yarımadada koronavirus hastalarınıñ sayısı arta, dep bildirgen edi.
Qırımnıñ sağlıq naziri Aleksandr Ostapenkonıñ malümatına köre, Qırımnıñ tibbiy müessiselerinde 2 810 hasta yeri bar. Keçken afta 585 koronavirus hastası hastahanege alındı, Qırımda 224 hastanıñ alı ağır ve pek ağır.
Qırımnıñ Rusiye yolbaşçısı Sergey Aksenov yarımadada yañı lockdown ilân etilmesi mümkün, dep qorqa.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.