Rusiye uquq qoruyıcıları Aqyarda "terror faaliyetinde iştirak etkeninde" qabaatlanğan er adamnı tuttı. Bu aqta Rusiye kütleviy haber vastaları FSB matbuat hızmetiniñ malümatına esaslanıp haber ete.
"Aqyarda Ukrayina mahsus hızmetleri casusınıñ qanunsız faaliyeti toqtatıldı, 1994 senesi doğma Rusiye vatandaşı devlet hainliginde ve terror teşkilâtınıñ faaliyetinde iştirak etkeninde şübheli ola", – dep bildire Rusiye uquq qoruyıcıları.
Er adam şeerde Rusiye Qara deñiz flotunıñ obyektlerini fotoğa çıqarğanı içün tutulğan eken. Adı ve soyadı aytılmay. Rusiye FSBsı tutulğan kişi olaraq tanıtılğan bir adam Ruse uquq qoruyıcılarınıñ versiyasını doğru dep aytqan videonı derc etti. Bu video basqı altında çıqarıla bile, cenk vaziyetinde onıñ doğrulığını teşkermek imkânsız ola.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı Qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar tutula ve Rusiye ordusını "itibardan tüşürüv" içün memuriy ve cinaiy mesüliyetke çekile.
Aq qorçalayıcılar, Qırımda Rusiye quvetçileri tarafından açılğan devlet hainligi, Ukrayina ile işbirligi, casuslıq ve diversiya maddeleri boyunca davalarnıñ sayısı artacağını tahmin eteler. Şimdi FSB bu kibi davalarnı aman-aman er kün aça, 2014 senesine qadar ise yılda 10 dava açıla edi.