Aqmescitteki «Hizb ut-Tahrir davasınıñ» mabüsi Rustem Seythalilov advokat Edem Semedlâyevge ağrı kesicinen keçmegen baş ağrıları aqqında şikâyet etti. Semedlâyev Aqmescit SİZOsınıñ tibbiy bölügine ariza berip, Seythalilovnıñ tibbiy tedqiqi yapılsın dep rica etti, dep haber ete «Qırım birdemligi».
«Müvekkilimni Aqmescit şeeriniñ FSB idaresinde kördim, anda dava malümatlarını muntazam sürette ögrene. Rustem, qorantası yollağan ve qullanğan «Tsitramon», «Spazmalgon», «İbuprofen» ilâcları oña yardım etmey, dep ayttı. Çoq ilâc alsa da, ağrı keçmey», – dedi advokat Semedlâyev.
Onıñ qayd etkenine köre, Rustem Seythalilov baş ağrısından sıq-sıq uyana ve daa beter olğanından yatıp olamay. Gece yuqusından soñ bütün künni ayaqta keçire.
SEE ALSO: «Birini begenmeyip, terrorist dep ilân eteler»Advokat Seythalilovğa tahqiqat izolâtorınıñ tibbiy bölügine de muracaat etmege tevsiye etti.
Hatırlatamız, avgustnıñ soñunda Aqmescitteki ekinci «Hizb ut-Tahrir davasınıñ» ilk tahqiqatı yekünlendi, bundan soñ dava mabüslerini beşer kişilik beş gruppağa bölgenler. Rustem Seythalilov Akim Bekirov, Seytveli Seytabdiyev, Eskender Suleymanov ve Asan Yanikov ile beşinci gruppağa kirdi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.