Aqmescitteki ekinci «Hizb ut-Tahrir davasınıñ» mabüsi Eskender Suleymanov eki aydan berli verem hastasınen beraber bir kamerada tutula. Bu aqta advokat Rustem Kâmilev «Qırım birdemligi» cemaat birleşmesine bildirdi.
«Eskender Suleymanovnen laf etip, eki aydan berli verem hastalığı olğan insannen bir kamerada tutulğanını ögrendim», – dep ayttı Kâmilev.
Suleymanov, advokatnıñ aytqanına köre, tibbiy bölükke şikâyet etip, kamerada tutulğan insanlarnıñ rentgenini yaptırmağa rica etken edi, amma Rusiye kontrolindeki Aqmescit SİZOsınıñ memuriyeti bir şey yapmay.
Qomşu Rusiyeniñ Soçideki umumiy adliye üçünci istinaf mahkemesi iyülniñ 13, 15 ve 16-nda Aqmescitteki ekinci «Hizb ut-Tahrir davasınıñ» sekiz mabüsiniñ istinaf şikâyetini baqıp, olarnı apiste qaldırdı. Riza İzetov, Remzi Bekirov, Eskender Suleymanov, Tofik Abdulgaziyev, Cemil Gafarov, Farhod Bazarov, Vladlen Abdulkadırov ve Yaşar Muyedinov daa eki ay – sentâbrniñ 15-ne qadar SİZOda qalacaqlar.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.