Aqmescitte "Zla Mavka" qadınlar tirenüv areketiniñ faalleri, Rusiye tsenzurasınıñ nezaretinden tış Ukrayina ve Rusiye vaziyetine dair haberlernen gazetalarnıñ yañı nushasını tarqattı.
Bu fotoresimlerni faaller Telegram kanalında derc etti.
"Biz kerçek malümatnıñ ne qadar müim olğanını ve işğalde bunıñ ne qadar zor olğanını bilemiz. Bu sebepten rusiyeliler qorqqan haberlerni derc etip, tarqatmağa devam etemiz. "Mavkalarımız pek yahşı çalıştılar ve Aqmescit sakinleriniñ poçta qutularına yañı sannı yolladılar", — dep aytıla fotoresim altındaki haberde.
Soñki vaqıtları Rusiye tarafından ilhaq etilgen Qırım ve Ukryaina cenübiniñ işğal etilgen topraqlarındaki muqavemet areketleri arasında "Zla Mavka" qadın partizan areketiniñ iştirakçileri faal. Qızlar ukrayin timsalleri ile risalelerni tarqata ve diger çoq sayılı qarşılıq aktsiyalarını keçire. Olarnıñ esas maqsadı — işğal altında birinci yıldan berli yaşağan semetdeşlerine qol tutmaq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.