İşğal etilgen Aqmescitte Rusiye memuriyeti mekteplerde «terrorizmge qarşı talimler» başlattı, olar evelden haber etilmeyip keçirile ve talebelerniñ şahsiy şeylerini tintüvnen beraber keçirile, dep bildire«Sarı şerit»areketi.
Qayd etilgenine köre, mektep talebelerini beklenilmegen alda tışqa çıqaralar, ocalar ise sırt çantalarını teşkerip başlay. Mektep çatlarında ana-babalarğa bu «yañı havfsızlıq strategiyasınıñ» bir qısmı olğanını aytalar.
«Biz qırımlılarnı muqayt olmağa ve azır olmağa çağıramız, çünki balalarnıñ mektep çantaları içindeki şeyler teşkerile bile», – dep qayd etti areketniñ koordinatorları.
Muarririyet faallerniñ beyanatını mustaqil şekilde teşkerip olamay.
Qırımtatar resurs merkezi esaplağanına köre, 2024 senesi Rusiye Qırımda eñ az 124 arbiy talim keçirdi. Keçken yıllarğa baqqanda büyük artış bar: 2023 senesi 40 talim, 2022 senesi 20 talim, 2021 senesi 44 talim keçirilgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.