Aqmescitte Rusiye kontrolindeki Qırım garnizon arbiy mahkemesiniñ binası ögünde Rusiye politsiyasınıñ hadimleri «Qırım birdemliginiñ» bir qaç faalini tuttı, olarnıñ arasında – birleşmeniñ mühbirleri Vilen Temeryanov, Ablâmit Ziyadinov bar, olar Grani.ru neşiriniñ jurnalistleri ola, em de Erfan Bekirov.
«Qırım birdemligi» bildirgenine köre, Qurmandaki «Hizb ut-Tahrir davasınıñ» mabüslerine qol tutmağa kelgen insanlar endi dağılıp başlağanda faaller tutuldı.
Vilen Temeryanov
«İnsanlarnıñ kütleviy toplaşuvı teşkil etildi. Onıñ (Vilen Temeryanovnıñ – QA) alâqası bar dep bilemiz. Deliller mahkemede berilecek. Memuriy bozuv kodeksine esaslanıp (tutamız – QA)», – dedi politsiya hadimi, özüni politsiya yolbaşçısınıñ cemaat nizamını qoruv muavini, politsiya mayorı Aleksey Stetsenko olaraq tanıttı.
Erfan Bekirovnı tutuv
«Politsiya öz işini yapa. Siziñ areketleriñiz politsiya hadimleriniñ faaliyetine keder etüv olaraq tanıldı. Teşkerip yiberecekmiz», – dedi diger politsiya hadimi Erfan Bekirovnı tutıp.
Faallerniñ malümatına köre, tutulğanlar Aqmescitteki Rusiye İç işler nazirligi idaresiniñ №3 «Merkeziy» politsiya bölügine alıp ketirildi.
Aqmescitte noyabrniñ 3-nde 200-ge yaqın qırımtatarı Rusiye kontrolindeki Qırım garnizon arbiy mahkemesiniñ binası ögüne kelip, bugün Rusiyeniñ Rostov-na-Donudaki Cenübiy okrugınıñ arbiy mahkemesi tarafından umumen 42 yılğa üküm etilgen Qurmandaki «Hizb ut-Tahrir davasınıñ» mabüslerine qol tuttı.
Rustem Emiruseinovğa 17 yıl apis cezası berildi, ilk eki yılı apishanede, qalğanı sert rejimde keçecek. Arsen Abhairov 13 yılğa üküm etildi, ilk eki yılı apishanede keçecek. Eskender Abdulganiyev 12 yılğa üküm etildi, ilk eki yılını apishanede keçirecek.
Bundan ğayrı, mahkeme nezaret altında qaluv müddetini apis cezasına saymağa qarar berdi.
Your browser doesn’t support HTML5
«Stalin rejiminiñ usulları». Qurmandaki «Hizb ut-Tahrir davasınıñ» mabüsleri soñki sözüni ayttı (video)
Noyabrniñ 2-nde aqşam Qırımdan Rostov-na-Donuğa Qurmandaki «Hizb ut-Tahrir davasınıñ» mabüsleriniñ ükmü çıqarılğanına ketken yüzlernen qırımtatarı Keriç köpründe Rusiye yol patrul hızmetiniñ hadimleri tarafından tutuldı. On saat beklegen soñ insanlar Qırımğa qayttı. Advokat Nikolay Polozovnıñ qayd etkenine köre, Rusiye quvetçileri qırımtatar faallerine qarşı «areket serbestligi aqqını» bozdı.
Rusiye uquq qoruyıcı organları vaziyetni resmiy şekilde izaatlamadı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.