Rusiye kontrolindeki Aqmescitniñ Kiyev rayon mahkemesinde Bağçasaray ve Aqyar rayonlarında tintüvler vaqtında tutulğan dört qırımtatar qadınına (Esma Nimetullayeva, Nasiba Saidova, Elviza Aliyeva ve Fevziye Osmanova) sıñırlav tedbirini belgilev oturışuvları keçti. Bu aqta Qırım birdemligi haber ete.
Binağa Qırımnıñ çeşit regionlarından soy-soplar ve qırımtatarlar keldi. Mahkeme tutulğanlarnı eki ayğa SİZOğa yolladı.
Nimetullayevanıñ menfaatlarını temsil etken advokat Emil Kurbedinov oturışuvda «FSBniñ müvekkillerimiz saqlana bile degen sözleri yanğıradı».
«Lâkin bir delil kösterilmedi, – dep qayd etti imayeci. – Esma dayana, mümkün olğanı qadar. Mahkeme oturışuvında qafeste edi. Saçma ve deşetli vaziyet, qanunnen bağlı bir şeyi yoq ve qabaatsız insanlarnı azatlıqtan marum etüv şeklinde ağır aqibetleri bar».
20 yaşında Aliyevanıñ imayecisi Edem Semedlâyevniñ bildirgenine köre, qız daa evel memuriy mesüliyetke bile çekilmegen olsa da, onı SİZOğa yolladılar.
Tutulğan qadınlarnıñ sıñırlav tedbirini belgilev oturışuvları qapalı şekilde keçti. Qayd etilgenine köre, bu dava Qırımda «Hizb ut-Tahrir» ile alâqalarınen bağlı qadınlarğa qarşı ilk dava oldı.
«Qırım birdemligi» haber etkenine köre, polis insanlardan bina yanını terk etmesini rica etti ve anda tek tutulğanlarnıñ tuvğanları qaldı.