Berilgen malümatqa köre, tutulğannıñ adı Andrey Perelıgin. İddia etilgenine köre, o, Qırımnıñ Ukrayina tarafından işğalden qurtarıluvı yaqın dep ayttı, «SVO (Rusiye akimiyeti Ukrayinağa qarşı cenkni böyle adlandıra – QA) iştirakçileri aqqında yaramay laf etti, olarğa qarşı terbiyesizlik kösterdi ve işğalciler dep adlandırdı».
Bundan ğayrı, Perelıginniñ telefonında rington olaraq «Çervona Kalına» ukrayin yırı qoyulğan, dep iddia eteler.
Haberde aynı vaqıtta Rusiye mahkemesi bu adamnı 15 künge apiske aldı, oña 50 biñ rus rublesi para cezası berildi, dep aytıla.
Bu dava boyunca Rusiye havfsızlıq küçleriniñ resmiy haberleri yoq edi. Bundan da ğayrı, tutulğan adamdan ya da onıñ mudafaasından bir izaat yoq.
Rusiyede ve onıñ tarafından işğal etilgen topraqlarda quvetçiler Ukrayına tarafdarlarını taqip ete. Rusiye tarafdarı qırımlı bloger Aleksandr Talipov öz telegram kanalında Ukrayınağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ «areketini yaramaylaştırğanı» içün memuriy ve cinaiy mesüliyetke çekile.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva haber etkenine köre, 2023 senesi Rusiye Federatsiyasında ve Ukrayınanıñ işğal etilgen topraqlarında ordunı itibardan tüşürgen er altıncı ceza Qırımda qayd etildi. Açıq davalarnıñ sayısı ise 70,6% arttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.