İyülniñ 4-nde Aqmescitte Rusiye quvetçileri eki musulman diniy mektebine barıp, Rusiye Federatsiyasında yasaq etilgen edebiyatnı tapqanlar, bundan soñ tasil müessiseleri qapatıldı. Qırımnı işğalden qurtaruv #LiberateCrimea halqara areketiniñ Qırım bölüginde Qırım.Aqiqatqa, mektepler Rusiye tarafdarı qırımtatar faali Eyvaz Umerovnıñ çaqması ile qapatılğanını bildirdiler.
Şimdi Rusiye mudafaa nazirligi ile añlaşma tizgeni esirlerden teşkil etilgen Rusiye ordusınıñ Ukrayinağa qarşı cenkleşken bölüginde cenkleşken Eyvaz Umerov Rusiye quvetçilerine çaqmalar yazmağa devam ete.
"Umerov VKontakte saifesinde bu mekteplerniñ Rusiyege qarşı ideologik yönelişleri aqqında malümat derc etti. O, yazısına izaat berip, "bütün uquq qoruyıcılarğa yollanıla ve neticeler de bar", dep bildirdi. 2014 senesine qadar Umerov Sudaq regional meclisiniñ yolbaşçısı olmağa tırışqan edi, amma adamlar oña qol tutmadılar. İşğalden soñ o Ruslan Balbekniñ gruppasına qoşuldı, "Qırımtatarlarnıñ milliy-medeniy muhtariyeti" Rusiye cemaat teşkilâtına yolbaşçılıq etti, Sudaq memuriyetiniñ Rusiye yolbaşçısınıñ muavini vazifesini aldı. Soñra qoruyıcısı ile beraber Qırımnıñ rusiyeli akimiyetine qarşı çıqtı ve er şeyni, şu cümleden azatlıqnı da, ğayıp etti. Belli ki, böyle etip, o, özüni ög safından çıqarmaq içün Rusiye mahsus hızmetlerinde yañı qoruyıcılar tapmağa tırışa", — dep tarif etti Qırım.Aqiqatqa #LiberateCrimea faali, onıñ soyadını muarririyet telükesizlik sebeplerinden aydınlatmay.
Rusiye akimiyeti bildire ki, qapatılğan mektepler "Ukrayina tarafdarı olğan" "Tavriya müftiyatı" musulman teşkilâtına ait edi.
"Aqmescitte daa eki islâm diniy mektebi qapatıldı. Sahte tasil müessiseleri "Tavriya müftiyatı" degen qanunsız Ukrayinağa qol tutqan musulman teşkilâtınıñ imayesi altında çalışa edi, o, Livandan kelgen ecnebiy mefkürecilerge yönelip, islâm müitinde destruktiv mefküre tarqata edi", — dep bildirdi TASS Rusiye devlet agentligine menba.
Ukrayinada cenk başlağanından berli tahminen 700 biñ musulman Rusiye işğali altında qaldı, 300 biñ ise köçip keldi, dep bildire Ukrayina prezidentiniñ Qırım Muhtar Cumhuriyetindeki Temsilciliginiñ matbuat hızmeti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.