Aqmescitte qırımlı advokatlar Emil Kurbedinov ve Edem Semedlâyevniñ ofisinde cam sındırğanlar, dep haber ete jurnalist Anton Naumlük.
Onıñ bildirgenine köre, adise bazar künü, dekabrniñ 9-nda, saat 17:00-da oldı.
«Qırımda aq qorçalayıcılarğa ve mustaqil advokatlarğa daa bir kere basqı yapılğanını tüşünemiz, bu areketler advokat Emil Kurbedinovnıñ mahkeme taqibi ile aynı oldı. Uquq usullarını qullanıp, faaliyetimiznen oğraşmayıq dep, bizge basqı yapmağa tırışalar. Tünevinki adise bizge qarşı qanunsız usullarnı qullanmağa azır olğanını kösterdi», – dep izaatladı uquqçı Nazim Şeihmambetov.
Onıñ malümatına köre, advokatlar Rusiye politsiyasına muracaat etti.
Kreml kontrolindeki Aqmescitniñ Kiyev rayon mahkemesi dekabrniñ 7-nde qırımlı advokat Emil Kurbedinovnı 5 künge tevqif etti.
Kurbedinov 2013 senesi Facebookta paylaşqanları içün Rusiye Memuriy cinayetler kodeksiniñ 20.3 maddesi boyunca (natsist işaretleri ya da timsalleri, ekstremist teşkilâtlarnıñ işaretleri ya da timsalleri, ya da federal qanunlarnen yasaqlanğan işaret ve timsalleriniñ teşviqatı ve açıq numayış etilmesi) apiske alındı. Kurbedinovnıñ zenaatdaşları dey ki, onı Dimaşqqa köçken Qırım sakini şikâyet etti.
Your browser doesn’t support HTML5
«Çette qalmağa mümkün degil». Qırımtatarlar advokat Kürbedinovğa nasıl qoltuttı (video)
Advokatnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
Emil Kurbedinovnıñ advokatı Aleksey Ladin Aqmescitniñ Kiyev rayon mahkemesinde çıqışta bulunıp, cinayet olmağanı içün dava qapatılmalı, dedi. Ladin 2013 senesi Qırımda «Ukraina uquqı bar edi, oña köre bu timsaller yasaq altında degil. Cinayet işlemek kibi bir niyet de yoq edi», dep hatırlattı. Mahkeme adise eski olğanına baqmadan, memuriy davanı qapatmaq muracaatını red etti.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.