Rusiye kontrolindeki Qırım akimiyeti Aqmescitniñ büyük qısmı kelecek afta suvsız qalacaq, dep tenbiley. Bu aqta oktâbrniñ 2-nde Aqmescit, Bağçasaray ve Aqmescit rayonlarında suv meselesinen bağlı toplaşuvında aytıldı.
«Aqmescit sakinlerini tenbileymiz, kelecek afta, cumaaqşamı künü, «Krım TETs» profilaktika işleri yapılacaq. Şunıñ içün cumaaqşamı künü aqşam üstü suv berüv cedveline riayet etilmeycek», – dep ayttı Qırımnıñ Rusiye ükümetiniñ reisi Yuriy Gotsanük.
Aqmescitniñ bir sıra qasaba sakinlerinde oktâbrniñ 1-nden oktâbrniñ 2-i sabasına qadar «Krım TETs» tehnologik suv temini sistemasında qazaiy-tamir işleri keçirilgeni içün» suv kesildi. Akimiyet, suv ketirilecek cedvel tizildi, dep haber etti.
Gidromettsentr, sentâbr yağmurları yarımadanıñ suv anbarlarını toldurmadı, dep bildirdi.
Rusiye kontrolindeki Aqmescit memuriyeti şeerlilerni suvnen teminlev vaziyetini «stabil» dep saya.
Rosgidromet sentâbrniñ 30-nda yağanaqlarnı arttırmaq içün Aqmescitke uçaq keldi, dep bildirdi.
Sentâbrniñ 7-nden itibaren Aqmescitte, Bağçasaray ve Aqmescit rayonlarında qurğaqlıq ve suv anbarlarında suv azlaşqanı sebebinden suv berüv sıñırlarınıñ üçünci, eñ sert etapı başlatıldı.
Qırımnıñ Rusiye ükümeti bildirgenine köre, yarımadanıñ suv teminatı ile «eñ yaramay stsenariyge» azırlanalar. Kreml kontrolindeki Qırım yolbaşçısı Sergey Aksenovnıñ bildirgenine köre, Rusiye Qırımnıñ suv teminatı vaziyeti fevqulâde olğanını tanıy. O, 2020 senesi 150 yıl içinde eñ quru oldı, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.