Aqmescitniñ 1-inci SİZO-sınıñ tibbiyet bölüginiñ hadimleri 17 yılğa üküm etilgen dörtünci Bağçasaray "Hizb ut-Tahrir" gruppasınıñ kör figurantı Aleksandr Sizikovnıñ vesiqalarını qabul etmekni red etti. Bu aqta qırımlınıñ anası Elenağa atıf etip, "Qırım birdemligi" haber ete.
Anasınıñ aytqanı kibi, oğlunıñ hastalıqları aqqında vesiqalar, sanki eski tarihlar sebebinden qabul etilmedi. Tibbiy bölükte, Sizikovnıñ tibbiy teşkerüvini özleri keçireceklerini bildirdiler.
Qırımlınıñ anası aytqanı kibi, 2009 senesi yol qazasından soñ oğlu bütünley kör oldı, diger bir qaza sebebinden ise onıñ talağı kesildi. Sızikovnıñ daa bir hronik hastalığı bar — aşçıq, boyun ve omurğasınıñ hastalığı bar, onıñ içün muntazam sürette masaj ve mütehassıslarnıñ nezareti kerek.
Sentâbr 14-te aqşam Sizikovnı eşyalarını toplamağa bermey, Bağçasarayğa alıp kettiler, dep tarif ete onıñ anası Yelena. Sentâbrniñ 19-na keçken gecesi onı 1-nci SİZO-ğa avuştırğanlar.
Aq qorçalayıcılarnıñ qayd etkenine köre, Rusiye qanunlarına binaen, körüvni bütünley ğayıp etken insanlarnı tüzetüv müessiselerinde apis cezasından azat etmek kerek. Amma Rusiye mahkemesi Aleksandr Sizikovnı ceza izolâtorında bulunmaq aqqına malik insan olaraq tanıdı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.