Aqmescitte tamir işleri sebebinden şeerniñ bir qısmı bir afta cedvel boyunca suv alacaq.
Bunı aprelniñ 28-inde "Voda Krıma" müessisesi bildirdi.
"Mate Zalki soqağında temiz suv rezervuarlarında tamir işleri sebebinden, "Mate Zalki" mikrorayonı ve 51 Armii soqağı ve yanındaki soqaq ve aralıqlar 28.04.20-den 05.05.20-gece cedvel boyunca suv alacaq", - denile beyanatta.
Malümatqa köre, añılğan adresler boyunca suv saba saat 06:00-dan 09:00-ğace ve aqşam saat 18:00-den 22:00-gece berilecek.
Your browser doesn’t support HTML5
Воды для Крыма не будет. Дамба на канале не готова | Крым.Реалии ТВ
Martnıñ 12-nde Rusiye kontrolindeki Qırım ükümetiniñ reisi Yuriy Gotsanük, suv boru hatları eskirgeni içün yarımadada içme suvunıñ 50 fayızı coyula, dep bildirdi.
Keçken afta Qırımnıñ Rusiye yolbaşçısı Sergey Aksenovnıñ bildirgenine köre, yağanaqlar olmasa bile, Aqmescitniñ üç esas suv çoqrağı olğan Ayan yapma gölü, Aqmescit ve Partizan suv anbarlarındaki suv yedegi şeerni 3,5 ay devamında toqtamayıp suvnen temin etmek içün yeter.
Herson vilâyetiniñ devlet memuriyeti, aprelniñ 4-nde Şimaliy-Qırım kanalı toldurıldı ve kanaldan işğal etilgen Qırımğa suv berilmey, dep işandırdı.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.