Aqmescit ve Bağçasarayda İlk yaznıñ 16-nda gece patlavlar eşitildi, ücüm altında 220 kV "Bağçasaray" elektrik stansiyası ola bile, dep yazalar içtimaiy ağlarda.
Bu aqta "Krımskiy veter" telegram-kanalı abunecilerine atıf eterek yaza. Bundan ğayrı, Kefe ve Keriçte dronlarnıñ uçması ve ateş açılması aqqında haber etildi.
Rusiye akimiyeti ücümlerniñ ihtimalı aqqında şimdilik haber etmedi.
İlk yazda Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.