Aqmescitte ve Aqyarda martnıñ 23-nde alış-veriş merkezoyeriniñ minalanğanı aqqında haber etildi. Bu aqta içtimaiy ağlarnıñ qullanıcıları ve yerli kütleviy haber vastaları bildire.
VKontakte içtimaiy ağında «Simferopol CITY» gruppası Aqmescitteki «Yujnaya Galereya» alış-veriş merkezinden bütün hadimleri ve ziyaretçiler tahliye etildi, dep bildirdi. Rusiye Fevqulâde vaziyetler nazirliginiñ hadimleri keldi. Qırım kütleviy haber vastalarınıñ malümatına köre, «Yujnaya Galereya» alış-veriş merkezinde patlayıcı cihazlar tapılmadı.
Aqyarda da alış-veriş merkeziniñ «minalanması» oldı. İçtimaiy ağlarnıñ qullanıcıları ve «Novıy Sevastopol» neşiri bildirgenine köre, «Musson» alış-veriş merkeziniñ ziyaretçileri tahliye etildi.
«Şimdi obyektte patlaması mümkün olğan şeyler tapılmadı, şeer sakinleriniñ ayatı içün bir telüke yoq», – dep bildirdi «Novıy Sevastopol» neşirine Aqyardaki Rusiye İç işler nazirligi idaresiniñ matbuat hızmeti.
Qırımtatar Milliy Meclisiniñ azası, «Qırımtatar resurs merkeziniñ» yolbaşçısı Eskender Bariyev Qırımdaki alış-veriş merkezleriniñ «minalanması» aqqında haberni izaatlap, bu Rusiye FSBsiniñ «büyük provokatsiyasınen» bağlı ola bile, dep bildirdi. O, Qırım sakinlerini muqayt olmağa çağırdı. Rusiye uquq qoruyıcıları Bariyevniñ aytqanlarını açıq sürette izaatlamadı.
Rusiye akimiyeti alış-veriş merkezleriniñ «minalanması» aqqında resmiy şekilde bildirmedi.
Qırım ve Aqyarda içtimaiy obyektlerniñ «minalanması» aqqında yalan haberler sıqlaştı. Kimligi belli olmağan insanlar mektep, bala bağçaları, mahkeme, şeerlerniñ Rusiye memuriyetlerini «minalay». Böyle adiselernen bağlı cinaiy davalar açıla.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: d3hzcgsd893cx5.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.