Qırımnıñ Rusiye prokuraturası 19 yaşında Aqmescit sakinini "terakt" azırlağanında qabaatladı, dep haber ete müessiseniñ matbuat hızmeti fevralniñ 26-nda.
"2024 senesi iyün ayında o, Rusiye Federatsiyası tarafından terror teşkilâtı olaraq tanılğan teşkilâtnıñ iştirakçisi oldı. İçtimaiy ağlardan biriniñ açıq kanalından malümatnı oqup, o, terror ücümini kerçekleştirüv usullarını ögrendi", – dep yaza Rusiye prokuraturası.
Angi teşkilât aqqında aytıla müessise bildirmey.
Berilgen malümatqa köre, 2025 senesi mart ayında genç yaqıcı madde azırlap, onı Aqmescitte qullanmağa planlaştırğan edi. Rusiye uquq qoruyıcılarınıñ malümatını cenk vaziyetinde teşkermek imkânsız ola.
Qabaatlanğannıñ adı ve soyadı haberde aytılmay, bu qabaatlavnen bağlı fikirleri de aydınlatılmay. Cinaiy dava Rusiyeniñ Cenübiy okrugınıñ arbiy mahkemesine yollandı.
Aq qorçalayıcılar devlet hainligi, Ukrayina ile işbirligi, casuslıq ve diversiya maddelerine istinaden davalarnıñ sayısı artacaq, dep tahmin ete. Şimdi FSB böyle davalarnı aman-aman er kün aça, 2014 senesine qadar ise olarnıñ sayısı yılda eñ çoq 10 edi.