Kreml kontrolindeki Aqmescitniñ Kiyev rayon mahkemesi Jemçujina Krıma köyüniñ Dilâver Gafarovnı apiske aldı. «Qırım birdemligi» birleşmesiniñ advokat Seyar Paniçniñ malümatına esaslanıp bildirgenine köre, Gafarov dekabrniñ 25-ne qadar nezaret altında qaldırıldı.
Advokatnıñ aytqanına köre, prokuraturanıñ malümatı formal şekilde baqıldı.
«Qadı dava malümatlarına, Gafarovnıñ şahsiyetine diqqat etmedi. O, mahküm etilmegen edi, bundan evel uquq qoruyıcı organlarınıñ oña nisbeten iddiaları yoq edi. Qadı buña emiyet bermedi», – dep qoştı Seyar Paniç.
Your browser doesn’t support HTML5
Qırım mahkemesi Dilâver Gafarovnı apiske aldı (video)
Malüm olğanı kibi, Dilâver Gafarov silâlı birleşmede iştirak etmesinde (Rusiye Ceza kodeksiniñ 208-inci maddesiniñ 2-nci qısmı) şeklene.
Oktâbrniñ 30-nda saba İslâm-Terek rayonınıñ Jemçujina Krıma köyünde Rusiye uquq qoruyıcıları yerli sakin, tükân satıcısı Dilâver Gafarovnıñ evinde tintüv keçirdi.
«Qırım birdemliginiñ» Qırım.Aqiqatqa bildirgenine köre, Gafarovnıñ evinde silâ qıdırıp, «bir şey tapmadılar». Uquq qoruyıcılar Gafarovnıñ bilgisayarı, telefonı, vesiqaları, Ukraina ve Rusiye pasportları alındı. Uquq qoruyıcılar eki qıznı Kefeden şaat olaraq ketirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.