Malümatnen beraber Rusiye kontrolindeki Aqmescit köy şurasınıñ yolbaşçı muavini İrina Beytullayeva imzalağan plâjlar qapatıluvına dair qararnıñ fotoresimi tarqatıla. Muarririyet bu vesiqanıñ doğru olıp olmağanını tasdıqlap olamay.
Aqmeçitte plâjlarnıñ qapatıluvına dair emir fotoresimi
Bunıñnen beraber, Qırımnıñ Aqmeçit rayonı Rusiye memuriyetiniñ yolbaşçısı Aleksandr Dudinov qasabada plâjnıñ merkeziy qısmı qapatıldı, dep bildirdi. Onıñ aytqanına köre, qapatuv «Tar körfez baqıluvınıñ işlerinen» bağlı.
Qırım.Aqiqat mühbiri bildirgenine köre, avgustnıñ 9-nda gece Aqmeçitte patlavlar eşitildi. Yerli sakinler er şey limanda oldı ve 4 gemi battı, dep ayta.
Rusiye monitoring kanalları urıp tüşürilgen uçucısızlar ve yoq etilgen deñiz dronı aqqında bildirdi, lâkin bunı tasdıqlaycaq malümat yoq.
Rusiye Mudafaa nazirligi Qırımda beş uçucısız, Qara deñizde daa sekiz dane tüşürildi, dep bildirdi. Qara deñizde yedi insansız kater yoq etilgen eken.
Ukrayina Mudafaa nazirligi Baş istihbarat idaresi bildirgenine köre, 2024 senesi avgustnıñ 8-nden 9-na keçer gecesi Aqmeçit yaqınlarında MAGURA V5 darbe deñiz dronu yardımınen «Tunets» Rusiye süratlı kateri yoq etildi. Daa üç Rusiye gemisi zarar kördi. Rusiye tarafı bu malümatnı daa izaatlamadı. Cenk vaziyetinde em Ukrayina, em Rusiye akimiyetiniñ malümatını mustaqil menbalarda teşkermek imkânsız ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.