(Başını mında oquñız)
Başqırtistanğa kelip çıqtıq. Vagondan çıqamız – 40 adam, eki sırağa böldiler. Kene qırçma taqtılar, yanımızda avtomatçılar, köpekler. Maşnağace tahminen 1 kilometr kettik, qollarmız qırmaça ve torbalarımıznıñ ağırlığından ağıra...
Emir yaqın kete: "Qardaşım, er şey yahşı, men mındam!". Ramazan da yanımda kete, bir torbamnı aldı, maña yardım ete. Mazallı aqaydır. Allah oña sağlıq berdi. Maşnağa barıp yettik, oturdıq, Ufa şeeriniñ SİZO-sına kettik.
Kene tintüv. Soñ kiçik kameralarğa yerleştirdiler - dımlı, suvuq, avalandıruv yoq, keneften sasıy. Ve SİZO hadimi ilân etti: "SİZO-da koronavirus adiseleri bar". Mına saña daa bir yahşı haber!
Refat Alimov, Arsen Cepparov, Vadim Siruk, Emir-Üsein Kuku, Müslim Aliyev, İnver Bekirov
SİZO hadimi ilân etti: "SİZO-da koronavirus adiseleri bar"
Gece. Mında tek üçer skemle bar. Er kes tura. Ne ise qaynatqıç alıp, çay damlamaq ve biraz qızınmaq mümkün.
Gece ayaq üstünde keçti. Kim skemlege yatıp yuqladı, kim çokip oturıp yuqladı. Saba kene tintüv keçirdiler, amağa barıp keldik, karantin kameralarğa yerleştirdiler. Emirni başqa kamerağa alıp kettiler...
Kamerağa kirdik. Kiçik, Ğaliba 2,5 metr. Dört yataq. Başta eki adam edik, soñ daa eki adamnı ketirdiler.
Saba hastalanğanımnı añladım – sıcağım köterildi, öksürip başladım. Belledim suvuqlandım, amma eki künden soñ köksüm sızlap başladı. Soñra kameramdaki daa ekisi hastalandı. Ekimni saba, üyle, aqşam çağıramız...
"Meşğul. Siz çoqsız, o i siz bir. Doquz bölük. Er kes hasta", - deyler.
Ertesi künü kene kelmey. Üçünci kün, küçüm endi yoq edi. Teftişçige, ekim kelmegence kamerağa kirmeycekmiz, deymiz. Ne isteseñiz yapıñız, isteseñiz bütün gece turıñız, dedi.
Yahşı, deyim. Maña ekimniñ adını, soyadını aytıñız men şikâyet etecegim. Malümatnı berdiler, amma 5 daqqadan soñ ekim de keldi. Baqtı bizni. Belki de COVID-19, belki de yoq, dedi.
Test yapmadı. Sıcaqnı tüşürgen ilâc berdi. Başqa bir şey yoq eken. Men açuvımdan sögünmek ya da külmek, ne yapacağımnı bilmedim. Mevdvedevniñ sözlerini hatırladım: "Para yoq, amma bekleñiz!" Bizde eki afta bekledik, soñra Allahqa şükür, biraz yengilleşti.
Vadim Siruk, vatandaş jurnalisti, faal, aq qorçalayıcı teşkilâtlar tarafından siyasiy mabüs olaraq tanıldı
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.