Qırımlı jurnalist Şevket Namatullayev martnıñ 27-nde Qırımda tintüvlerden soñ apiske alınğan qırımtatar faalleriniñ balalarına toplağan para aqqında esabat berdi.
«Kartta 87904 ğrn + elime berilgen 5550 ğrn bar. Bugün 93,404 ğrn + Kyivde cuma namazında toplanğan 2000 ABD dolları bar (54 biñ ğrıvnâ – QA). Er kes sağ olsun. Para toplamağa devam etemiz», – dep yazdı Namatullayev Facebookta.
Aprelniñ 3-ne qadar umumen 147404 ğrıvnâ toplandı.
Rusiyeniñ Qırım ilhaqından soñ yarımadada ana-babaları siyasiy sebeplerden apiske alınğan 100-den ziyade qırımlı balağa yardım etken «Bizim balalar» hayriye fondu qurulğan edi.
Rusiye kontrolindeki Aqmescitniñ Kiyev rayon mahkemesi martnıñ 28-nde Rusiyeniñ Rostov-na-Donu şeerinde Rusiyede yasaqlanğan «Hizb ut-Tahrir» teşkilâtınıñ faaliyetine alâqaları bar olğanından şübheli sayılıp tutulğan «Qırım birdemligi» cemaat teşkilâtınıñ üç faalini apiske aldı.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde Aqmescitniñ Kiyev rayon mahkemesi tutulğan doquz qırımtatar faalini tevqif etti.
Martnıñ 28-nde Aqmescitniñ rayon mahkemesi martnıñ 27-nde Rusiye uquq qoruyıcıları tarafından tutulğanlardan 14 qırımtatar faalini apiske aldı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.