Aqmescitteki ekinci «Hizb ut-Tahrir davasınıñ» mabüsi Cemil Gafarovnıñ sağlıq vaziyeti fenalaştı. Bu aqta o, Qırım.Aqiqatta olğan mektüpniñ bir parçasında yazdı.
«Sağlıqnı aytsam, alım yahşı degil. Ekimlerge añlatmaq aman-aman imkânsız. Nevbetçi feldşer bir şey yapıp olamay. MÇ-3-ke (tibbiy bölük – QA) kirmege çare yoq, talil bermeli, ekimlernen mesleat keçirmege, muracaatlarğa ise qulaq asılmay», – dep yaza Cemil Gafarov.
Aqmescitteki ekinci «Hizb ut-Tahrir davasınıñ» mabüsi Cemil Gafarovnıñ mektübi
Gafarovnıñ advokatı Rifat Yahin müvekkili bulunğan Rostov-na-Donu №5 SİZOsına tibbiy yardım almaq içün ariza berdi (vesiqa muarririyette bar – QA).
«O, Qırımda SİZOda olğanda, bu meselede daa qolay olğan edi. Şikâyetlerine cevap berip başlağanlar, ekim kelip baqa ve ara-sıra kerekli tibbiy tedbirlerge çıqara edi. Şimdi onı başqa tahqiqat izolâtorına etap etkenler ve yañıdan başlamaq kerek. Men kerekli ariza berdim, daa bir kere bütün tibbiy vesiqalarnı ilâve ettim», – dep izaatlay advokat.
Aqmescitteki ekinci «Hizb ut-Tahrir davası» ilk sefer 2021 senesi martnıñ 18-nde temelden baqıldı.
Fevral ayında berilgen malümatqa köre, apiske alınğan qırımlı Gafarov Rostov-na-Donu SİZOsında kritik alda buluna.
Yahin, müvekkiliniñ ayaq podagrası başlandı ve hronik büyrek hastalığı ve Rusiye SİZOsınıñ memuriyeti tibbiy yardım köstermegeni içün sağlıq vaziyeti pek fenalaştı, dep bildirdi.
2020 senesi avgust ayında, Gafarov Aqmescit SİZOsında bulunğanda, Qırım ve Aqyardaki Cezalarnı yerine ketirüv federal hızmetiniñ idaresi ekim onıñ sağlıq vaziyetini taqip ete, dep bildirgen edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 insan tutuldı. Cemil Gafarov da olardan biri ola. Aqmescitniñ Kiyev rayon mahkemesi episini apiske aldı.
Rusiye kontrolindeki Qırım Yuqarı mahkemesi Aqmescitteki «Hizb ut-Tahrir davası» altı mabüsiniñ – vatandaş jurnalisti Remzi Bekirov, faaller Farhod Bazarov, Şaban Umerov, Cemil Gafarov, Raim Ayvazov ve aq qorçalayıcı Riza İzetovnı apiste tutuv müddetini 2021 senesi yanvarniñ 14-ne qadar uzattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.