Rusiye Federatsiyası Baş prokuraturasınıñ vekili, vatandaşlarnı qabul etüv bölüginiñ üyken prokurorı “Hizb ut-Tahrir” teşkilâtı ile alâqalarında şübheli sayılıp apiske alınğan Esma Nimetulayeva, Nasibe Saidova, Elviza Aliyeva ve Fevziye Osmanovanıñ azat etilmesinen bağlı muracaatnı qabul ettiler. Bu muracaat altında 6,5 biñ imza toplandı, dep haber ete “Qırım birdemligi” cemaat birleşmesi.
“Bizni kelmege ve şahsen körüşmege mecbur etken meseleniñ qırımtatarlar arasında emiyetli ve rezonanslı ola, dep qayd ettik. Bunıñ isbatı – prokurorğa berilgen muracaat altında biñlernen imza. Muracaatımızğa ayrı diqqat olsun ve adiy devlet bürokratiyası yolundan ketmesin dep rica ettik”, – dep ayttı uquqçı Nazim Şeyhmambetov.
Oktâbrniñ 31-nde eyyet Rusiye Federatsiyası prezidentiniñ memuriyeti ve Rusiye insan aqları vekâletlisi Tatyana Moskalkovanıñ ofisine muracaatta bulundı.
Eki kün devamında eyyetni uquq qoruyıcı organlarınıñ hadimleri taqip etti. Uquq qoruyıcılarnıñ kontroli altında delegatlar Rusiye prezidenti memuriyetine, Rusiye Baş prokuraturasına kirdi. Bugün Baş prokuraturanıñ binasına avtozak keldi, amma eyyetten kimse tutulmadı.
Soñki bir buçuq kün devamında bu muracaat berilmezden evel Rusiye uquq qoruyıcıları Rusiye ombudsmenine ketken qırımlılar eyyetini beş kere tuttı.
- Birinci kere Boguçarskiy rayonındaki (Voronej vilâyeti) İç işler nazirligi bölüginde oldı ve dört buçuq saat devam etti.
- Ekincisi – Hlevenskiy rayonındaki İç işler nazirligi bölüginde (Lipetsk vilâyeti), eyyet anda altı buçuq saat tutuldı. Delegatlarnıñ aytqanına köre, İç işler nazirliginiñ hadimleri “ekstremizm teşkerüvi yapılmalı”, dep ayttı.
- Üçüncisi Tula vilâyetinde, Venev şeerinde oldı, Moskvadan 200 kilometr uzaqta. Qırımtatarlarnı Rusiye yol patrul hızmeti toqtattı, soñra İç işler nazirliginiñ hadimi ve adiy urbada üç insan qoşuldı.
- Dördünci kere eyyet Koltovo yolunda toqtatıldı – Moskvadan 120 kilometrde. Rusiye uquq qoruyıcıları özüni cinaiy qıdıruv hadimleri olaraq tanıttı, betlerinde maska ve qollarında avtomat bar edi. Tutulğanlar Kaşira şeer okrugındaki Rusiye İç işler nazirligi bölüginden “memuriy uquq bozuvları, cinayet ve cemaatqa qarşı areketler olsa”, mesüliyet aqqında tenbiler aldı.
- Beşinci kere eyyet Moskvada toqtatıldı. Moskalkovanıñ ofisinden beş daqqa qalğan yerde. Yol patrul hızmetiniñ hadimleri bütün yolcularnıñ pasportlarını “teşkermege” aldı. Soñra eyyet iştirakçilerine vatandaş urbasında insanlar keldi. Tutulğanlar toqtatılğanlarınıñ ve vesiqaları ne içün berilmegeniniñ sebebini soramağa tırışıp, amma Rusiye uquq qoruyıcıları suallerine cevap bermedi. Vesiqalar teşkerilgen soñ tutulğan altı qırımlı Qırım mikroavtobusları qalğan yerge qaytacaqlar şartınen yiberildi.
Oktâbrniñ 16-nda Rusiye kontrolindeki Aqmescitniñ Kiyev rayon mahkemesi dördüni de eki ayğa SİZOğa yolladı.
Oktâbrniñ 28-nde haber etilgenine köre, Qırımda Rusiye uquq qoruyıcıları tarafından tutulğan Elviza Aliyeva, Nasibe Saidova ve Fevziye Osmanovanıñ analarına apiste tutulğan qızlarına bir şey yollamağa izin berilmedi.
Oktâbrniñ 29-nda Rusiye kontrolindeki Qırım Yuqarı mahkemesi beş bala anası Esma Nimetulayeva, terbiyeci Nasibe Saidova, student Elviza Aliyeva ve iş adamı Fevziye Osmanovanıñ advokatlarınıñ istinaf şikâyetlerini red etip, qırımlılarnı apiste qaldırdı.
Aq qorçalayıcılar qayd etkenine köre, Qırımda qırımtatar qadın-qızlarına qarşı açılğan ilk Hizb ut-Tahrir davası oldı.
“Hizb-ut-Tahrir" teşkilâtı Rusiyede terror teşkilâtı olaraq tanıla, lâkin bir çoq memlekette yasaqlanmay.