Rusiyeniñ Rostov-na-Donu Cenübiy okrugınıñ arbiy mahkemesinde Aluştadaki «Hizb ut-Tahrir davası» boyunca 15-inci oturışuv olıp keçti, prokuratura delillerni tedqiq etti.
«Qırım birdemligi» birleşmesi haber etkenine köre, oturışuv vaqtında dava mabüslerinden biri olğan Eldar Kantimirovnıñ paketi açıldı, anda bir qaç din kitabı ve risaleler bar edi.
«Rusiye Federatsiyası islâmofobini ne qadar inkâr etse de, bu kitaplarnıñ yasağı o ola. Dua, ulu alimlerniñ emekleri yasaq etile. Olar bütün dünyada bar, terrorizmnen bağlı bir söz bile yoq. Rusiye islâmofobiden vazgeçmeli», – dep ayttı Kantimirov mahkemede.
«Qırım birdemligi», Rusiye mahkemesi diger mabüslerniñ şeylerini de tedqiq etti, dep qoştı.
«Bu müvekkilimniñ qabaatını nasıl isbatlay añlamayım, tahqiqatçı alınğan bütün şeylerni davağa ilâve etti», – dedi advokat Siyar Paniç. O, Ruslan Mesutovnıñ menfaatlarını temsil ete.
Kelecek oturışuvlarda qabaatlav şaatlarınıñ sorğusı planlaştırıla, dep qayd etti «Qırım birdemligi».
Daa evel belli olğanına köre, Aluştadaki «Hizb ut-Tahrir davasınıñ» üç mabüsi Lenur Halilov, Eldar Kantimirov ve Ruslan Nagayev Rusiyeniñ Rostov-na-Donudaki SİZO-1-den SİZO-5-ke avuştırıldı.
Your browser doesn’t support HTML5
Eldar Kantimirovnıñ tutuluvı (video)
Aluştadaki «Hizb ut-Tahrir davasınıñ» mahkemesinde qadı hastalanğanı içün uzun teneffüs ilân etilgen edi. Dava baqıluvı 2020 senesi dekabrniñ 22-nde yañıdan başladı.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.